Fransız filosof Denis Didro, demək olar ki, bütün həyatı boyu yoxsulluq içərisində yaşamışdı. Amma 1765-ci ildə bir gün onun həyatı dəyişdi.
Didronun qızı ailə qurmağa hazırlaşırdı və o, toy xərclərini qarşılaya bilmirdi. Kasıb olsa da, Didro “Ensiklopediya”nın təsis edilməsindəki roluna görə tanınırdı. Rus çariçası II Yekaterina Didronun maliyyə çatinliklərini eşidir. O, kitabları çox sevir və “Ensiklopediya”ya böyük maraq duyurdu. Buna görə də Didronun şəxsi kitabxanasını almağı təklif edir. Didro yeni sərvəti ilə qızının toy xərclərini qarşılamaqla yanaşı, özünə al-qırmızı xalat da alır.
Yeni xalatı o qədər gözəl idi ki, Didro tezliklə digər əşyalarının ona uyğun olmadığını anlayır və onları dəyişdirməyə başlayır. Dəməşqdən xalça alır, evini bahalı heykəllərlə bəzəyir və s. Yıxılan domino daşları kimi hər alış-veriş arxasınca yenisini gətirir. Didro effekti adlanan bu davranış çoxumuz üçün xarakterikdir.
Şirkətlər Didro effektindən istifadə edərək satışları artırmağın və əlavə gəlir əldə etməyin yollarını bilirlər. Nümunə olaraq, müştərinin notbuk aldığını fərz edək. Notbuku bir müddət istifadə edən müştəri müşahidə edir ki, notbuk qızır, ekranda barmaq izləri qalır, klaviatura düymələri arasında toz toplanır və s. Bu problemləri aradan qaldırmaq üçün satışda soyutma yastığı, ekran qoruyucu, klaviatura qoruyucu və s. var. Müştəri istifadə rahatlığını təmin etmək üçün bu ləvazimatları da alır. Beləliklə, notbuk satan şirkət əlavə ləvazimatları da sataraq gəlirlərini artırır.
