Bəzən Excel xanalarında yazılan məlumatları bir xanada birləşdirməli oluruq. Bunun üçün CONCATENATE funksiyasından və ya sadəcə ampersand işarəsindən (&) istifadə edə bilərik. Lakin bu yol həmişə işə yaramır. Çünki CONCATENATE funksiyası parametr olaraq xanaları bir-bir qəbul edir, yəni birbaşa diapazona istinad etsək, məlumatları birləşdirmək əvəzinə nəticə olaraq yalnız bir xananın məlumatını qaytaracaqdır.
Buna görə də xanaların sayı çox olduqda məlumatlarıı birləşdirmək üçün CONCATENATE funksiyasından istifadə etmək əlverişsizdir, çünki hər bir xananı bir-bir daxil etməli olacağıq. Bu problemi aradan qaldırmaq üçün aşağıdakı üsuldan istifadə edə bilərik:
- Nəticə əldə edəcəyimiz xanaya =TRANSPOSE(A1:A4) və ya =A1:A5 funksiyasını daxil edib ENTER düyməsini sıxırıq.
- Funksiyadakı A1:A4 hissəsini qeydə alıb F9 (bu işə yaramasa, Fn+F9) düyməsini sıxırıq. Bu əməliyyat funksiyanı dəyərlərə çevirir.
- Alınan nəticədə fiqurlu mötərizələri silib TRANSPOSE funksiyasının əvəzinə CONCATENATE yazırıq və ENTER düyməsini sıxırıq.
Yekun olaraq =CONCATENATE(A1;A2;A3;A4) funksiyası alınır, lakin xanaları bir-bir daxil etməyimizə ehtiyac qalmadan bu üsulla istənilən sayda xananı birləşdirə bilərik.
Bu əməliyyat sözlərin arasına boşluq əlavə etmədən onları birləşdirir. Sözlər arasına boşluq əlavə etmək üçün aşağıdakı üsuldan istifadə edirik:
- Nəticə əldə edəcəyimiz xanaya =TRANSPOSE(A1:A4)&” ” və ya =A1:A5&” ” funksiyasını daxil edib ENTER düyməsini sıxırıq.
- Funksiyadakı A1:A4 hissəsini qeydə alıb F9 (bu işə yaramasa, Fn+F9) düyməsini sıxırıq. Bu əməliyyat funksiyanı dəyərlərə çevirir.
- Alınan nəticədə fiqurlu mötərizələri silib TRANSPOSE funksiyasının əvəzinə CONCATENATE yazırıq və ENTER düyməsini sıxırıq.
Yekun olaraq =CONCATENATE(A1,” “,A2,” “,A3,” “,A4) funksiyası alınır.
Boşluq əvəzinə defis, vergül və s. istənilən işarədən istifadə etmək olar.
Buradaykən, Sizdən kiçik bir xahişimiz var. Bildiyiniz kimi, biz – “INNAB” komandası olaraq ana dilində peşəkar inkişafı təmin etmək məqsədi ilə məzmun (kontent) yaratmaqla da məşğuluq. İşinə məsuliyyətlə və həvəslə yanaşan komandamız bu işi təmənnasız şəkildə yerinə yetirir. Komandamız məzmunlarımızın daha çox insanların izləməsini görüb daha da motivasiya olur. Bu işdə sizin də dəstəyinizə ehtiyacımız var. Bu postu paylaşmaqla, həmçinin hər baxıb bəyəndiyiniz videoları, məqalələri daha çox insana tövsiyyə etməklə, youtube kanalımıza, bloqumuza, facebook/linkedin/instagram səhifəmizə abunə olmaqla həm bizi motivə edə, həm də peşəkar inkişafınız üçün zəmin yarada bilərsiniz.
